திமுக பொருளாளர் பதவிக்கு டி.ஆர். பாலு சார்பில் வேட்புமனுத் தாக்கல் செய்யப்பட்டது. அவரது வேட்புமனுவை திமுக அமைப்புச் செயலாளர் ஆர்.எஸ் பாரதி பெற்றுக்கொண்டார்.
திமுகவில் பொதுச்செயலாளராக இருந்த அன்பழகனின் மறைவுக்குப்பின் அப்பதவி காலியாக உள்ளது. இதனையடுத்து அந்தப் பதவிக்கு பொருளாளராக இருக்கும் துரைமுருகன் போட்டியிடுவதற்காக, பொருளாளராக பதவியை ராஜினாமா செய்தார். இதனால் இருபதவிகளும் காலியானதாக அறிவிக்கப்பட்டது.
இருபதவிகளுக்கும் மார்ச் 29 ஆம் தேதி பொதுக்குழு நடத்துவதாக இருந்தது. ஆனால், கொரோனா வைரஸ் பரவல் காரணமாக திமுக பொதுக்குழு தேதி குறிப்பிடாமல் ஒத்தி வைக்கப்பட்டது.
இதனையடுத்து தற்போது வரும் 9 ஆம் தேதி திமுக பொதுக்குழுக் கூட்டம் கூடுகிறது. பொருளாளர் பதவிக்கான வேட்புமனுத் தாக்கல் இன்று (செப் 3) நடைபெறும் என்றும், 4 ஆம் தேதி பரிசீலனையும், 5 ஆம் தேதி வரையில் வேட்பு மனுக்களை திரும்ப பெற்றுக்கொள்ளலாம் என்றும் திமுக சார்பில் அறிவிக்கப்பட்டது.
இந்த நிலையில், இன்று திமுக பொருளாளர் பதவிக்கு டி.ஆர். பாலு சார்பில் வேட்புமனுத் தாக்கல் செய்யப்பட்டது. திமுக அமைப்புச் செயலாளர் ஆர்.எஸ் பாரதி, டி.ஆர் பாலுவின் வேட்புமனுவைப் பெற்றுக்கொண்டார்.
திமுகவைப் பொறுத்தவரையில் போட்டியின்றி நிர்வாகிகள் தேர்வாகி வருகின்றனர். அந்த வகையில், பொதுச்செயலாளராக துரைமுருகனும், பொருளாளராக டி.ஆர். பாலும் தேர்ந்தெடுக்க வாய்ப்புகள் உள்ளதாக கூறப்படுகிறது.