தமிழகத்தில் அரசுப் பணிகளில் தமிழக இளைஞர்களுக்கே முன்னுரிமை அளிக்க வேண்டும் - மு.க.ஸ்டாலின்

தமிழ்நாட்டில் 90 லட்சம் இளைஞர்களுக்கு மேல் வேலை வாய்ப்பு அலுவலகத்தில் பதிவு செய்து விட்டு, இலவு காத்த கிளிகளைப் போல் காத்திருக்கும் இந்த நெருக்கடியான சூழலில், மத்திய பா.ஜ.க அரசும், அ.தி.மு.க அரசும் போட்டிப் போட்டுக் கொண்டு தமிழகத்தில் உள்ள காலிப் பணியிடங்களையெல்லாம் வட மாநிலத்தவருக்கு வாரி வழங்கி - தமிழக இளைஞர்களுக்கு துரோகம் இழைப்பதை இனிமேலும் பொறுத்துக் கொள்ள முடியாது என்று ஸ்டாலின் குறிப்பிட்டுள்ளார்.

 Share
EMAIL
PRINT
COMMENTS
தமிழகத்தில் அரசுப் பணிகளில் தமிழக இளைஞர்களுக்கே முன்னுரிமை அளிக்க வேண்டும் - மு.க.ஸ்டாலின்

வேலையில்லாத் திண்டாட்டம் தமிழகத்தில் பெருகிக் கொண்டிருக்கின்ற நிலையில், மத்திய - மாநில அரசுகள் உரியத் திருத்தங்களைக் கொண்டு வந்து தமிழக இளைஞர்களுக்கு முன்னுரிமை வழங்க முன்வர வேண்டும் என்று திமுக தலைவர் மு.க.ஸ்டாலின் வலியுறுத்தியுள்ளார். இதுதொடர்பாக அவர் வெளியிட்டிருக்கும் அறிக்கையில் கூறியிருப்பதாவது-

''மதுரை ரயில்வே கோட்டத்தில் நடைபெற்ற ரயில்வே பணியிடங்களுக்கான தேர்வில் வட மாநிலத்தவர்கள் 90 சதவீதம் பேர் தேர்வு செய்யப்பட்டுள்ளார்கள் என்ற செய்தி அதிர்ச்சியளிப்பதாக இருக்கிறது. அந்தத் தேர்வில் தமிழகத்தைச் சேர்ந்த இளைஞர்கள் 10 பேர் கூட தேர்வாகவில்லை என்பது கடும் கண்டத்திற்குரியது.

மத்தியில் பா.ஜ.க அரசும், இங்கு முதலமைச்சர் எடப்பாடி திரு. பழனிசாமி தலைமையிலான அரசும் அமைந்தப் பிறகு, தமிழக இளைஞர்களுக்கு தமிழகத்திலேயே வேலைவாய்ப்பு கிடைப்பது என்பது கேள்விக்குறியாகிவிட்டதோடு மட்டுமின்றி - ஏற்படுகின்ற பணியிடங்களிலும் வட மாநிலத்தவர் திணிக்கப்படுகிறார்கள் என்பது இரட்டை வேதனையளிக்கிறது.

திருச்சி பொன்மலை ரயில்வே பணிமனையில் வேலைக்குத் தேர்வு செய்யப்பட்ட 300 பேரில் ஒருவர் கூட தமிழகத்தைச் சேர்ந்த இளைஞர் இல்லை. பிறகு ஐ.சி.எப் ரயில்வே தொழிற்சாலையில் தொழில் பழகுநர் பணிக்குத் தேர்வு செய்யப்பட்ட 1765 பேரில் 1600 பேர் வட மாநிலத்தைச் சேர்ந்த இளைஞர்கள். தமிழகத்தில் உள்ள மத்திய அரசு அலுவலகங்கள் அனைத்திலும் வடமாநிலத்தவர்களை அதிக அளவில் நியமனம் செய்து- தமிழகத்தைச் சேர்ந்தவர்களை அடியோடு புறக்கணிக்கும் விபரீத விளையாட்டை மத்திய பா.ஜ.க. அரசு நடத்தி வருகிறது.

பிற மாநிலங்களிலிருந்து துணை வேந்தர்களை ‘இறக்குமதி' செய்ததில் தொடங்கி - இப்போது வட மாநில இளைஞர்கள் மூலமே தமிழகத்தில் உள்ள அனைத்து மத்திய அரசு அலுவலக பணியிடங்களையும் நிரப்பி விட வேண்டும் என்று கொடிய வஞ்சக எண்ணத்துடன் மத்திய பா.ஜ.க. அரசு செயல்படுவது கவலையளிக்கிறது.

இங்குள்ள அ.தி.மு.க அரசோ, தமிழ்நாடு மின்சார வாரியத்திற்கு வட மாநில இளைஞர்களை ‘இஞ்சினியர்களாக' தேர்வு செய்கிறது. ஏன், தமிழ்நாடு பப்ளிக் சர்வீஸ் கமிஷன் மூலம் நடைபெறும் தேர்வுகளை வட மாநிலத்தவர் எழுதலாம் என்று கூறி - இப்போது 176 சிவில் நீதிபதிகள் பதவிக்கு நடைபெறப் போகும் தேர்விலும் வட மாநில இளைஞர்கள் தேர்வு எழுதலாம் என்று சூசகமாக அறிவிப்பு வெளியிட்டுள்ளது.

9.9.2019 அன்று தமிழ்நாடு பப்ளிக் சர்வீஸ் கமிஷன் வெளியிட்டுள்ள விளம்பர எண் 555/2019-ல் ‘தமிழ் தெரியாதவர்களும் தேர்வு எழுதலாம்' என்று கூறப்பட்டுள்ளது. கீழமை நீதிமன்றங்களுக்கும் அகில இந்திய அளவில் தேர்வு என்று மத்திய அரசு நினைக்கும் போதே, மாநில அரசு ‘சிவில் நீதிபதிகள்' தேர்வுகளை வட மாநிலத்தவரும் எழுதும் வகையில் அறிவிப்பு வெளியிட்டுள்ளது.

தமிழ்நாட்டில் 90 லட்சம் இளைஞர்களுக்கு மேல் வேலை வாய்ப்பு அலுவலகத்தில் பதிவு செய்து விட்டு, இலவு காத்த கிளிகளைப் போல் காத்திருக்கும் இந்த நெருக்கடியான சூழலில், மத்திய பா.ஜ.க அரசும், அ.தி.மு.க அரசும் போட்டிப் போட்டுக் கொண்டு தமிழகத்தில் உள்ள காலிப் பணியிடங்களையெல்லாம் வட மாநிலத்தவருக்கு வாரி வழங்கி - தமிழக இளைஞர்களுக்கு துரோகம் இழைப்பதை இனிமேலும் பொறுத்துக் கொள்ள முடியாது.

“மதுரை ரயில்வே கோட்டத் தேர்வுகளில் ஏன் தமிழக இளைஞர்கள் அதிகம் தேர்வாகவில்லை?” என்ற கேள்விக்கு ரயில்வே அதிகாரிகள் கூறியுள்ள காரணங்கள் முற்றிலும் பொருத்தமற்றவை.

ஆகவே, தமிழகத்தில் உள்ள மத்திய அரசு அலுவலகங்களின் காலிப் பணியிடங்களுக்கு நடைபெறும் தேர்வுகளில் இனிமேல், தமிழக இளைஞர்களுக்கு 90 சதவீதம் முன்னுரிமை அளிக்கும் வகையில் ‘போட்டித் தேர்வின் விதிமுறைகளை' மத்திய அரசு உடனடியாகத் திருத்த வேண்டும் என்றும்; தமிழக அரசு மற்றும் பொதுத்துறை நிறுவனங்கள் நடத்தும் தேர்வுகளில் தமிழக இளைஞர்களுக்கு மட்டுமே முன்னுரிமை என்ற வகையில் தேர்வு விதிகளை உருவாக்கிட வேண்டும் என்றும், சிவில் நீதிபதிகள் தேர்வில் முழுக்க முழுக்க தமிழக இளைஞர்களுக்கு மட்டுமே வாய்ப்பளிக்கப்பட வேண்டும் என்றும் வலியுறுத்திக் கேட்டுக் கொள்கிறேன்.

வேலையில்லாத் திண்டாட்டம் தமிழகத்தில் பெருகிக் கொண்டிருக்கின்ற நிலையில், மத்திய - மாநில அரசுகள் உரியத் திருத்தங்களைக் கொண்டு வந்து தமிழக இளைஞர்களுக்கு முன்னுரிமை வழங்க முன்வராவிட்டால், இளைஞர்களைத் திரட்டி மாபெரும் போராட்டத்தை நடத்த வேண்டிய கட்டாயம் ஏற்பட்டுவிடும் என்று எச்சரிக்க விரும்புகிறேன்'' 

இவ்வாறு ஸ்டாலின் தனது அறிக்கையில் குறிப்பிட்டுள்ளார். 



சமீபத்திய தமிழ்நாட்டுச் செய்திகள் சென்னை செய்திகள், அரசியல், வர்த்தகம், தொழில்நுட்பம், கிரிக்கெட் ஆகியவற்றின் தலைப்புச் செய்திகள் என ஒவ்வொரு நிகழ்வுகளையும் பற்றி தமிழில் படிக்க Facebook மற்றும் ட்விட்டர் Twitter ஐ பின் தொடருங்கள்.

NDTV Beeps - your daily newsletter

................................ Advertisement ................................

................................ Advertisement ................................

................................ Advertisement ................................